வலம்புரி சங்கு வீட்டில் வைப்பதால் பெறும் நன்மைகள் மற்றும் வணங்கும் முறை

வலம்புரி சங்கு தெய்வீகத்தன்மை வாய்ந்ததாகும். இதில் ஆண் சங்கு, பெண் சங்கு இரு வேறு வகைகள் உண்டு. இவற்றில் ஆண் சங்கில் மட்டுமே ஓம் என்னும் நாதம் கேட்டும். வலம்புரி சங்கினால் இறைவனுக்கு பூஜை, அபிஷேகங்கள் செய்வது பாவங்கள் அனைத்தையும் போக்கி, புண்ணியத்தை தரும். பிரம்மஹத்தி தோஷம் உள்ளிட்ட பல தோஷங்களை இது நீக்கக் கூடியதாகும்.

வலம்புரி சங்கினை வீட்டில் வைக்க வேண்டும் என்றால் அதை பராமரிப்பதற்கு என்று சில வழிமுறைகள் உண்டு. அதாவது வலம்புரி சங்கினை காலியாக வைக்கக் கூடாது, தரையில் வைக்கக் கூடாது என்றெல்லாம் பல விதிமுறைகள் உண்டு. இவற்றை முறையாக பின்பற்றினால் மட்டுமே சங்கின் வடிவில் மகாலட்சுமி நம்முடைய வீட்டில் நிரந்தரமாக வாசம் செய்வாள். இதற்குள் மகாலட்சுமிக்கு மிகவும் விருப்பமான ஏலக்காய், பச்சைக் கற்பூரம், துளசி, வெற்றிலை, லவங்கம் உள்ளிட்ட பொருட்களில் ஏதாவது ஒன்றை போட்டு வைப்பது சிறப்பானது.

வலம்புரி சங்கின் சிறப்புகள் :

இந்துக்களின் வழிபாட்டு முறையில் சங்க நாதம் இசைக்கப்படுவது மிக முக்கியமான ஒன்றாகும். இது மங்கலத்தின் அடையாளமாக கருதப்படுகிறது. சங்குகளில் மணிசங்கு, துவரி சங்கு, பாருத சங்கு, வைபவ சங்கு, துயிலா சங்கு என பல வகைகள் உண்டு. ஆனால் அவற்றில் மிக முக்கியமான நான்கு வகை சங்குகள் தெய்வீக தன்மை வாய்ந்ததாக கருதப்படுகின்றன.

இப்படி தெய்வீக தன்மை நிறைந்த சங்குகள், வலம்புரி சங்கு, இடம்புரி சங்கு, சலஞ்சலம், பாஞ்சசன்னியம் என்பனவையாகும். இவற்றில் பாஞ்சசன்னியம் என்பது மகாவிஷ்ணுவின் கையில் உள்ள சங்காகும். மற்ற மூன்றும் மகாலட்சுமியின் அம்சமாக சொல்லப்படுபவை. தேவர்களும், அசுரர்களும் பாற்கடலை கடைந்த போது கிடைத்த பல பொருட்களில் ஒன்று வலம்புரி சங்கு. மகாலட்சுமியுடன் சேர்ந்து பாற்கடலில் தோன்றியது என்பதால் இதை மகாலட்சுமியின் அம்சமாக கருதி வழிபடுகிறோம். வலம்புரி சங்கு என்பது வாய் பகுதி துவங்கி, சுழி வரை வலது புறமாக சுழன்று இருக்கும் சங்கிற்கு வலம்புரி சங்கு என்று பெயர்.

வலம்புரி சங்கு தரும் பலன்கள் :

வலம்புரி சங்கு, இடம்புரி சங்கு ஆகிய இரண்டுமே விசேஷமானது என்றாலும் வலம்புரி சங்கு மிகவும் விசேஷமானதாகும். எந்த ஒரு வீட்டில் வலம்புரி சங்கு உள்ளதோ அந்த வீட்டில் மகாலட்சுமியின் அருட்கடாட்சம் நிரந்தமாக நிறைந்திருக்கும். செல்வம் வலம் பெருகும், ஆரோக்கியம், ஒற்றுமை, நிம்மதி என அனைத்தும் தலைத்தோங்கும். வீட்டில் வலம்புரி சங்கு இருந்தால் மகாலட்சுமியின் அருள் கிடைக்கும், செல்வம் பெருகும் என்பதற்காக கடையில் வலம்புரி சங்கினை கொடுத்து வாங்கி, வீட்டில் கொண்டு வந்து பூஜை அறையில் வைத்து விட்டு, ஒன்றும் நடக்கவில்லை என புலம்புவது தவறு.

வலம்புரி சங்கினை பராமரிக்கும் முறை :

வலம்புரி சங்கு மகாலட்சுமியின் மறுவடிவம் என்பதால் மகாலட்சுமிக்கு கொடுக்க வேண்டிய மரியாதையை கொடுத்து, அதை பயன்படுத்துவதற்கான முறையில் பயன்படுத்தினால் அதன் பலன்கள் முழுமையாக நமக்கு கிடைக்கும். வலம்புரி சங்கினை வெறும் தரையில் வைக்கக் கூடாது. சங்கு வைப்பதற்குரிய ஆசனத்தில் வைக்க வேண்டும். அல்லது ஒரு புதிய பட்டுத்துணி ஒன்று வாங்கி அதன் மீது வலம்புரி சங்கினை வைக்க வேண்டும். சங்கு மிகவும் மென்மையானது என்பதால் அதை மிகவும் கவனமாக பயன்படுத்த வேண்டும். உடைந்த சங்கினை ஒரு போதும் பயன்படுத்தக் கூடாது.

தண்ணீர் நிரம்பி வைக்கலாமா?

வலம்புரி சங்கில் தண்ணீர் நிரப்பி வைப்பது சிறப்பானது. சங்கு தீர்த்தம் மிகவும் புனிதமானதாகும். ஆனால் சங்கில் நீர் நிரப்பு வைப்பதாக இருந்தால் கண்டிப்பாக அதை தினமும் மாற்ற வேண்டும். அந்த தண்ணீரில் துளசி இலை, மல்லிகைப்பூ, தாமரைப்பூ இதழ் ஆகிய ஏதாவது ஒன்றை போட்டு வைக்க வேண்டும். பூஜை செய்த இந்த தீர்த்தத்தை மறுநாள் நாம் குடிக்கலாம். வீடு முழுவதும் தெளித்து விடலாம். இதனால் துஷ்டசக்திகள், எதிர்மறை ஆற்றல்கள் விலகி விடும்.

அரிசி வைத்தால் கடைபிடிக்கும் விதிகள் :

ஒருவேளை அரிசி நிரப்பி வைப்பதாக இருந்தால், அந்த அரிசியை குறைந்தபட்சம் 15 நாளைக்கு ஒருமுறையாவது மாற்ற வேண்டும். இந்த அரிசியை மாற்றும் போது ஏற்கனவே பயன்படுத்திய அரிசியை பறவைகளுக்கு இரையாக அளிக்கலாம். அல்லது இந்த அரிசியை மாவாக அரைத்து, கோலம் போடுவதற்கு பயன்படுத்திக் கொள்ளலாம். ஆனால் சங்கில் நிரப்பிய அரிசியில் பூச்சி, புழு ஏற்படும் வரை வைக்கக் கூடாது. முக்கியமான விசேஷ நாட்களில் தண்ணீருடன் பன்னீர் கலந்து வைத்து மந்திரம் ஜபித்து, அந்த தீர்த்தத்தை கொண்டு வீட்டில் உள்ள சுவாமி சிலைகளுக்கு சங்காபிஷேகம் செய்யலாம். இது சுவாமி சிலைகளுக்கு மேலும் சக்தி அளிப்பதாக இருக்கும்.