20 லட்சம் யூடியூப் வீடியோக்களை நீக்கிய கூகுள்… காரணம் இதுதான்?!

குறிப்பிட்ட நேரம் வரை யூடியூப் வீடீயோவை பார்த்தால் பணம் பெறலாம் என்ற மோசடிகளும், தீங்கிழைக்கக்கூடிய கன்டெட்கள் மற்றும் தவறான தகவல்கள் யூடியூபில் அதிகரித்து வருகின்றன.

சமீப காலங்களில் ஆன்லைன் மோசடிகள் அதிகரித்து வருகின்றன. இதன் நீட்சி யூடியூபிலும் தொடர்ந்ததையடுத்து பாதுகாப்பான ஆன்லைன் சூழலைப் பயனர்களுக்கு ஏற்படுத்துவதற்காக 20 லட்சம் யூடியூப் வீடியோக்களை கூகுள் நீக்கியுள்ளது.

கூகுள் ஃபார் இந்தியா 2023 நிகழ்ச்சி சமீபத்தில் நடந்தது. இந்த நிகழ்ச்சியில் கூகுளின் முன்னெடுப்புகள் குறித்து பேசப்பட்டது. அதாவது, குறிப்பிட்ட நேரம் வரை யூடியூப் வீடீயோவை பார்த்தால் பணம் பெறலாம் என்ற மோசடிகளும், தீங்கிழைக்கக்கூடிய கன்டெட்கள் மற்றும் தவறான தகவல்கள் யூடியூபில் அதிகரித்து வருகிறது.

எனவே, பயனர் தகவல்களைப் பாதுகாத்து, ஆன்லைன் பாதுகாப்பை மேம்படுத்துவதன் நோக்கமாக 2023-ம் ஆண்டின் இரண்டாம் காலாண்டில் கூகுளின் கொள்கை விதி மீறல்களுக்காக 20 லட்சம் யூடியூப் வீடியோக்களை நீக்கியிருப்பதாக கூகுள் தெரிவித்துள்ளது.

2023 ஜனவரி மற்றும் மார்ச் மாதத்துக்கு இடைப்பட்ட முதல் காலாண்டில் கூகுளின் கொள்கை விதி மீறல்களுக்காக 1.9 மில்லியனுக்கும் அதிகமான வீடியோக்களை கூகுள் நீக்கியுள்ளது.

இதுமட்டுமல்லாமல் கூகுள் பே மூலமாகக் கடந்த ஆண்டு நடக்கவிருந்த 12,000 கோடி ரூபாய் மதிப்பிலான மோசடிகளையும் வெற்றிகரமாகத் தடுத்திருக்கிறது.

நிறுவனத்தின் கொள்கைகளுக்கு இணங்காத 3,500-க்கும் மேற்பட்ட கடன் வழங்கும் ஆப்களுக்கு எதிராக நடவடிக்கை எடுத்துள்ளதாக கூகுள் கூறியுள்ளது.